ពិធីចូលម្លប់

តាមទំនៀមទំលាប់ខ្មែរយើងពីបុរាណតែងតែរៀបចំពិធីចូលម្លប់នៅពេល ដែលកូនស្រីរបស់ខ្លួនពេញវ័យក្រមុំ ដោយមិនគិតថាអ្នកមានឬអ្នកខ្សត់ខ្សោយឡើយ ប៉ុន្តែវិធីចូលម្លប់កូនស្រីមាន ៣ កម្រិត៖

១. កម្រិតតឹងៈ ត្រូវឲ្យកូនស្រីនៅតែក្នុងបន្ទប់ បិទជិតមិនឲ្យឃើញពន្លឺថ្ងៃឡើយ ហូបតែម្ហូបបួស គឺគ្មានជាតិសាច់ ហាមមិនឲ្យសត្វមាន់ ឃើញ ខ្លាចដាច់តំនម។ បានន័យថា ពេលថ្ងៃមិនចុះដី គឺចុះបានតែពេលយប់ងងឹតសូន្យសុង។

២. កម្រិតកណ្តាលៈ ចុះដីនៅពេលថ្ងៃបាន តែហាមមិនឲ្យធ្វើការធ្ងន់ គឺធ្វើការងារស្រាលៗ តែត្រូវហូបម្លូបបួសដដែរ។

៣. កម្រិតទាប់បំផុតៈ ធ្វើការនិងហូបចុកជាធម្មតា គ្រាន់តែមិនទៅធ្វើការក្រៅផ្ទះ គឺធ្វើការតែក្នុងផ្ទះ ហើយនៅក្រោមម្លប់ជានិច្ច។ លុះត្រាដល់គ្រប់ កំណត់រយៈពេល ៣ ខែ ទើបមាតាបិតារៀបចំពិធីចេញពីម្លប់។

បញ្ជាក់ៈ អ្នកក្រលំបាកខ្លាំង រៀបចំឲ្យកូនស្រីចូលម្លប់តែកន្លះខែ ទៅ ១ ខែក៏មាន។ ឯអ្នកមានវិញ ទុកឲ្យកូននៅក្នុងម្លប់អស់រយៈពេល ១ ឆ្នាំទៅ ២ ឆ្នាំក៏មាន។

ប្រភពៈ សៀវភៅអាពាហ៍ពិពាហ៍ខ្មែរ